PIWELING KANGGO ANAKKU ING JAMAN AKHIR

PIWELING KANGGO ANAKKU ING JAMAN AKHIR

Ngger…,atmajaku kinasih

Sliramu wis ngancik dhewasa

Dijero nggonmu sinau agama

Supaya tumata tutur laku nira

Bisaha njunjung salira, nusa lan bangsa

Aja culika, dora, lan dosa  gawe nista

Ngger…., putra putriku kinasih

Dadiya manungsa pideksa lan manis

Ugemana quran lan hadis

Aja lamis gawe miris       

Aja ndhermis seneng  ngemis

Mundhak  wong liya dadi nangis

Becik asung paweweh utawa perwira

Tinimbang ngapusi, korupsi dadi duratmaka

Elinga : Kang Maha Kwasa tansah niti pirsa

Nadyan sliramu kalingan wukir lan samudra

Ngger …anakku kinasih

Jembrengen talingan lan netra

Kuwatna iman sakjroning dhadha

Waskita anggomu bebrayan ing marcapada

Sebab…..,

Wis akeh priyagung kang sembrana

Akeh paraga panutan kang murang tata

Akeh tuntunan dadi tontonan lan diece

Akeh tontonan dadi  tuntunan rame rame

Pertandha gelaring jagad bakal ora suwe

Aku lan kowe kudu sengkud ngibadahe

Supaya iklas tumata nalika Malaikat ngawe –awe

Becik tansah sepi ing pamrih, rame ing gawe

Lelabuh minulya, luhur wekasane

Pungkasane jembar dhadha lan swargane

Ngger…..

Elinga , Gusti Alloh ora sare….

Banjarnegara , Selasa : 6 Desember 2016

Purwo Setiono