PESAN DI HARI ULANG TAHUN TERAKHIR

Purwo Setiono Setiono

DAK ANTU ESEMMU

Wis adoh lakuku
nekseni peteng padhange jagad
durung nemu legining hakekat
kang diwulangna syareat
amangka salah dosa
wis pepek ngebaki dada

Menawa sliramu bisa nuntun laku
ulungna teken para empu
kanggo mowot shirothol mustakim
kagungane Gusti Maha Rohim
sukur sliramu kersa ngancani
dene ora
paringana pepadhanging ati
kanggo mbedakna reged lan suci
mrih ora ngrusak laku lan lathi
kanggo nyadhong ridlone Gusti

Wis adoh lakuku
nekseni gebyaring dunya
mesthi bakal nemoni wates
mula paringana donga kang deres
kanggo bukti sliramu mitra sejati
nadyan tresna wis rampung
nanging silaturrahmi tetep kudu disambung

Dak antu esemmu kang ngujiwati
nalika jasadku diwungkus mori
Menawa iki ulang tahun kang pungkas
digedhe pangapuramu kanthi ikhlas